Нийслэлийн Иргэдийн Төлөөлөгчдийн Хурлын дарга Д.Ихбаяр Экологийн цагдаагийн албаны удирдлагуудтай уулзаж, хүрээлэн буй орчны эсрэг гэмт хэрэг, зөрчлийн нөхцөл байдал болон тулгамдаж буй асуудлуудын талаар санал солилцлоо.
Экологийн цагдаагийн алба 2026 оны эхний хагас жилийн байдлаар шалган нэвтрүүлэх товчоодоор илрүүлсэн гэмт хэргийн шинжтэй 64, зөрчлийн шинжтэй 1141 үйлдэ, хүрээлэн буй орчны эсрэг 460 зөрчлийг илрүүлжээ.
Мөн ашигт малтмал хууль бусаар тээвэрлэсэн 28, загас агнууртай холбоотой 22 үйлдлээр 689 ширхэг загас, зэрлэг гахайн махтай холбоотой 11 үйлдлээр 33 кг мах, мод тээвэрлэсэн 35, хуш модны самар тээвэрлэсэн 2 үйлдлээр 600 кг самар тус тус хураан авчээ.
Түүнчлэн 117 үйлдлээр 252 ширхэг тарвага, хойлог шувуутай холбоотой нэг, амьтны эд эрхтэн тээвэрлэсэн, аргаль, янгирын эд эрхтэнтэй холбоотой хоёр, түүхий нүүрс хадгалж, түлсэн 17 зөрчлийг илрүүлэн шийдвэрлэсэн байна.
Нийслэлийн ИТХ-ын дарга Д.Ихбаяр, Нийслэлийн ИТХ-аас гарч буй шийдвэр, арга хэмжээний хүрээнд Экологийн цагдаагийн албатай нягт хамтран ажиллах нь чухал гэв. Ялангуяа Туул гол орчмын бохирдол, түүний эх үүсвэр, Улаанбаатар хотын алслагдсан гурван дүүрэгт үйл ажиллагаа явуулж буй химийн үйлдвэрүүд болон тэсэлгээний компаниудын үйл ажиллагааг хүн, байгаль аюулгүй түвшинд хянах, Нийслэлийн нутаг дэвсгэрт байгаль орчны нөхөн сэргээлтийн ажлыг эрчимжүүлж, холбогдох байгууллагуудтай хамтран үр дүнтэй зохион байгуулах зэрэг нийслэлийн экологийн аюулгүй байдлыг хангах, байгаль орчны эсрэг гэмт хэрэг, зөрчлийг бууруулах чиглэлд Нийслэлийн ИТХ-аас гарах шийдвэр, арга хэмжээний хүрээнд дэмжин ажиллахаа онцлов.